كلنا محتاجين لبعض

كلنا مجتاجين لبعض


كلنا محتاجين لبعض

سواق اوبر بيحكي
عايز احكي موقف حصل معايا امبارح ..كنت في منطقه المرج وطبعا ذي ما انتم عارفين المرج زحمه ومدغدغه ..جالي ريكوست ولقيت العميل بيتصل بيا بيقولي معلش بعد اذنك ممكن تجيلي لحد باب البيت.. انا عادة مبخشش حواري ولما بلاقي العميل جوه حاره بخليه ينزل ع اول الشارع ومخشش.. مش عارف ايه اللي خلاني اسكت ومتكلمش ومقولش غير كلمه حاضر يافندم.. وفعلا روحت للعميل جوه حاره البلكونات بتخبط في مرايات العربيه.. المهم العميل نزل فتح الباب اللي ورايا ودخل طفل صغير.. وهو جه جنبي ..بفتح الرحله لقتها ع مستشفي ٥٧٣٥٧..فقولت بيني وبين نفسي الحمد لله اني مقولتلوش تعلالي ع الشارع ..المهم هو اعتذرلي انه دخلني الشارع وقالي معلش اصل الولد كان واخد جلسه كيماوي امبارح ومش هيقدر يمشي لحد بره.. فقولت له ولا يهمك دا انا لو اعرف اطلع اجيبه من ع السرير والله لاعملها.. وقعدنا طول السكه ندردش لحد ماوصلنا امام المستشفي.. فقولتله الرحله دي هديه مني ليك ..قعد يحلف وصمم اني اخد تمن الرحله.. ياعم يهديك يرضيك ابدا.. المهم نهيت الرحله وحسابه طلع ٧٠جنيه.. راح مطلعلي ٢٠٠جنيه صحيحه وادهاني ..فقلتله والله انا مش معايا فكه خلاص خليها معاك وانت مروح رن عليا اجي اخدك ارجعك وابقي احاسبك ..المهم حلف اني ممشيش غير لما يحاسبني وقالي انا هنزل افك ..خلي الولد معاك وانا هاروح افك الفلوس.. نزل من العربيه راح لبتوع اللعب اللي بيقفوا قدام المستشفي يسألهم علي فكه قالوا له مفيش ..المهم بيسال الناس اللي قدام المستشفي اللي داخلين قالوا له معناش.. كان في تاكسي معدي الناحيه التانيه من المستشفي.. فراح الراجل مشاورله و قاله معاك فكه يا اسطي.. قاله ايوه.. يادوبك الراجل اداله الفلوس من هنا والاسطي داس بنزين وجري بالفلوس.. وانا قاعد في العربيه شايف المشهد ومش عارف لو حاولت اجري ورا العربيه الولد موجود معايا وساعتها ابوه هيتخض عليه.. وحتي لو جريت عقبال ما الف واكون في نفس اتجاه التاكسي هيكون هو طاااار ..والراجل واقف مصدوم ع الرصيف مش عارف يعمل ايه.. لقيته مره واحده واقف ع الرصيف وبيقول بصوت عالي ياااارب مش كفايا كده انا فيا اللي مكفيني.. يااااارب انا معنديش طاقه لكل ده.. وقعد مكان ماهو واقف ع الرصيف وحاطط ايده ع دماغه وبيبكي.. وانا ده كله قاعد في العربيه مصدوم ..روحت نازل من العربيه بحاول اخد بخاطره.. واقوله خلاص يابو محمد الحمد لله انها جت في الفلوس.. رد علي وقالي يابراهيم والله دي اخر ٢٠٠جنيه معايا قلت ادفع المواصلات رايح جاي واجيب لعبه للواد انسيه الوجع اللي هو فيه.. طبعا الناس اتلمت وخلاص ياحاج وربك كريم والكلام اللي احنا عارفينه ده ..ومره واحده عربيه جيب شروكي كانت واقفه جنب المستشفي وتقريبا صاحب العربيه شاف الموقف.. العربيه وقفت عندنا وصاحبها نزل وحط كبشه فلوس في جيب عم ابو محمد وركب العربيه ومشي ..ولا حتي قال كلمه ..كلنا وقفنا مستغربين من الموقف ولقيت ابو محمد بيقولي هو مين ده انت تعرفه.. قلتله لا.. بس ع العموم اهه ربك رزق.. قوم تعالي بقي ياعم نقعد في العربيه ونقسم الفلوس سوا ع سبيل الهزار يعني.. قام معايا عم ابو محمد ودخلنا العربيه وطلع الفلوس وفضل يعد طلعوا كام؟؟ ٢٥٠٠جنيه.. بص للفلوس كده وقعد يعيط اكتر من الاول بسأله وبقوله طب ليه بتعيط ماربنا رزقك والحمد لله.. رد علي وقالي انا بعيط عشان قلة ادبي مع الله ورحمته ولطفه انا بقالي ست شهور مدفعتش ايجار الشقه والراجل صاحب البيت بيقولي عليه كل شويه واجمالي الايجار ٢٣٠٠جنيه وانا زهقت من الراجل لانه عارف حاله ابني ومش مقدر وبرضه مش صابر.. فاانهارده الفجر وانا ساجد دعيت ربنا قلتله يارب انا راجل ع الله وانت عالم بحالي ورزقي رزق اليوم بيومه.. فيارب ارزقني بفلوس الايجار ياما تحنن قلب الراجل علي ومتخلهوش يطالبني لحد ما انت برضه ترزقني.. فسبحان الله ربنا حلا ال٢٠٠جنيه في عيون سواق التاكس عشان يخدها ويجري.. عشان يجي واحد تاني يديله اللي طالبه من ربنا مع ان استحاله حد في مكان سواق التاكس يعمل اللي هو عمله ده.. لو كافر وقلبه حجر عمره ماهيسرق من قدام مستشفي السرطان لكن اراده ربنا خلاه ياخد الفلوس عشان يدي لعبده اللي طلبه حتي لو بطريقه غير مباشره ..ربنا رزق ابو محمد ب٢٣٠٠جنيه ايجار الشقه وال٢٠٠جنيه اللي اخدها سواق التاكس.. انا سمعت كده من عم ابو محمد وسلمت عليه ونزل من العربيه روحت قاعد جوه العربيه عمال اعيط وقول سبحانك ربي انت ارحم الراحمين
بجد من اصعب المواقف اللي عدت عليا في حياتي
سبحان الله وبحمده سبحان الله العظيم.....
تعليقى عالبوست من جهه اخرى
انت متعرفش الراجل اللى راكب الجيب ده حاله ايه
تلاقيه مبتلى ببلاوى و نازل يدور على حد عشان يطلع له صدقه يداوى بيها بلاويه
فى النهايه كلنا محتاجين لبعض ..دى الخلاصه ..فياريت نهدى كده كلنا على بعض عشان تعدى ...عدى بقى يا دنيا مش عايزين منك حاجه
طالبين الستر...و حسن الخاتمه
و دوام الصحة

 
التاريخ: 16/11/2019 - الزيارات: 730

أضف تعليقك على المقال

code

  • شاهد منزلك اون لاين مباشره والتجول في اكبر شوارع أمريكا

محرك البحث

الاستفتاء

ماهو موقعك المفضل؟

57.63%

4.96%

37.40%

57.63% Complete
4.96% Complete
37.40% Complete

أطلب خدمتك الآن من محترفين أطلب الآن خدمتك من محترفين
COVID-19 Dashboard by the Center for Systems Science and Engineering (CSSE) at Johns Hopkins University التسويق الالكتروني| مهندس بترول مصرى| DZForums| best ptc sites |اختبارات الفيس بوك |العاب |دارى اونلاين للتسويق العقاري| |6 - friendsكم عدد ابطال المسلسل الشهير| DMCA.com Protection Status

شاهد منزلك اون لاين مباشره والتجول في اكبر شوارع أمريكا